Láthair Dé

Agus mé i mo shuí anseo, is comharthaí iad,
bualadh mo chroí, tuile agus trá
m'anála, gluaiseachtaí m'aigne,
comharthaí go bhfuil Dia fós do mo
chruthú.
Moillim ar feadh nóiméid, agus tógaim faoi ndeara
Láithreacht seo
Dé istigh ionam.

Saoirse

Dá mbá mhian le Dia rud eigin a rá liom, an mbeadh a fhios agam?
Dá mbeadh sé
ag iarraidh mo dhúshlán a dhéanamh,
ná mé a chur ar mo shuaimhneas, an
dtabharfainn é faoi deara?
Iarraim air cabhrú liom bheith saor ó mo chúraimí
pearsanta féin,
agus ullamh leis an méid atá le rá aige a chloisteail.

Tabhair faoi deara

Conas atáim inniu? Maidir le Dia, conas atáim?
An bhfuilim buíoch as aon rud?
Más' ea, gabhaim buíochas leis.
An bhfuil brón orm faoi aon rud? Más' ea,
iarraim maithiúnas air.

Briathar Dé

Lúcás 5:27-32

Ina dhiaidh sin chuaigh sé amach agus thug faoi deara poibleacánach darb ainm Léiví, ina shuí i dteach an chustaim, agus dúirt leis: "Lean mise." D'fhág sé gach aon ní, d'éirigh agus lean é. Agus rinne Léiví fleá mhór dó ina theach, agus bhí cuideachta líonmhar de phoibleacánaigh agus de dhaoine eile ina luí ag bord ina gcuibhreann. Agus bhí na Fairisínigh agus a gcuid scríobhaithe ag monabhar, á rá lena dheisceabail: "Cad chuige a bhfuil sibh ag ithe agus ag ól leis na poibleacánaigh agus na peacaigh?" Agus dúirt Íosa leo á bhfreagairt: "Ní ag na daoine folláine a bhíonn gá le lia, ach ag na daoine tinne. Ní hiad na fíréin ach na peacaigh a bhfuilim tagtha á nglaoch chun aithrí."

Smaointí ar Scrioptúir an lae

  • Ag an am sin, ba iad na poibleacánaigh (na bailitheoirí cánach) na daoine ba shuaraí amuigh, de réir thuairimí an phobail.. Ach tugann Íosa a dhúshlán faoi thuairimí claonta a linne. Gaireann sé ar Léiví (is é sin, Naomh Matha), agus leis an ghairm sin músclaíonn sé é chun na féidearthachtaí daonna atá aige a aithint, agus meas a thabhairt dó féin dá réir. Tugann Matha droim láimhe feasta le bord na cánach chun suí i gcuibhreann le hÍosa ag béile na féile maithiúnais. Tá an trócaire le haimsiú i gcónaí i gcroílár mhisean Íosa.

  • A Thiarna, is ábhar sóláis dom an chaoi a síneann tú do lámh i dtreo an pheacaigh. Maith dom na hócáidí sin nuair a ligim do mo chlaontuairimí tionchar a imirt orm; agus breithiúnas míchothrom a thabhairt, nó daoine a chur ó dhoras dá bharr. Is mian liom suí i gcuibhreann leat, agus is cuma liom cé eile a bhíonn i láthair! Deonaigh an grásta dom freagairt ar do ghairm orm – agus tú a a leanúint pé treo a ngabhann tú.

Comhrá

Cuirim i gcuimhne dom féin go bhfuilim i láthair Dé i gcónaí.
Ansin, samhlaím
Íosa féin ina sheasamh nó ina shuí os mo chomhair amach.
Nochtaim m'intinn
agus rún mo chroí dó.
Déanaim comhrá Leis díreach mar a dhéanfadh cáirde lena
chéile.

Críoch

Glóir don Athair agus don Mhac agus don Spiorad Naomh,
Mar a bhí ar dtús, mar atá anois agus mar a bheas go brách;
Trí shaol na saol.

Amen