Sacred Space User Settings Menu

Tearmann

Do phaidir laethúil ar líne

Urnaí laethúil 2012-04-16

Láthair Dé

Agus mé i mo shuí anseo, is comharthaí iad,
bualadh mo chroí, tuile agus trá
m'anála, gluaiseachtaí m'aigne,
comharthaí go bhfuil Dia fós do mo
chruthú.
Moillim ar feadh nóiméid, agus tógaim faoi ndeara
Láithreacht seo
Dé istigh ionam.

Saoirse

Dá mbá mhian le Dia rud eigin a rá liom, an mbeadh a fhios agam?
Dá mbeadh sé ag iarraidh mo dhúshlán a dhéanamh,
ná mé a chur ar mo shuaimhneas, an dtabharfainn é faoi deara?
Iarraim air cabhrú liom bheith saor ó mo chúraimí pearsanta féin,
agus ullamh leis an méid atá le rá aige a chloisteail.

Tabhair faoi deara

Agus fhios agam go bhfuil grá gan choinníollacha ag Dia domsa,
is féidir liom a bheith macánta faoi chonas mar atáim.
Conas mar a bhí an lá liom? Agus conas a bhraithim anois?
Labhraim go macánta le Dia.

I sáinn?

Briathar Dé

Eoin 3:1-8

Bhí ar na Fairísinigh duine darbh ainm Níocodaemas, uachtarán ar na Giúdaigh. Tháinig an duine seo chuige san oíche agus dúirt leis: "Tá fhios againn, a raibí, gur oide thú a tháinig ó Dhia óir ní féidir le haon duine na comharthaí seo a dhéanann tú a dhéanamh gan Dia a bheith leis." D'fhreagair Íosa: "Amen, Amen," ar sé leis, "mura nginfear duine athuair ní féidir dó ríocht Dé a fheiceáil." Dúirt Níocodaemas leis: "Conas is féidir duine a ghiniúint agus é ina sheanduine? An amhlaidh a d'fhéadfadh sé dul isteach i mbroinn a mháthar agus teacht ar an saol athuair?" D'fhreagair Íosa: "Go deimhin féin a deirim leat, mura ngintear duine ó uisce agus ón Spiorad, ní féidir dó dul isteach i ríocht Dé. An ghin a gineadh ón bhfeoil is feoil í; an ghin ón Spiorad is spiorad í. Ná déan ionadh de go ndúirt mé leat: 'Ní foláir sibh a ghiniúint arís ó lastuas.' Séideann an ghaoth mar is áil léi. Is clos duit a glór, ach ní eol duit cad as di ná cá ngabhann sí. A dála san ag gach duine a ghintear ón Spiorad."

Smaointí ar Scrioptúir an lae

  • Is tráthúil urnaí a dhéanamh teacht na hoíche. Tá cúrsaí an lae ag druidim chun suain ansin, agus is lú seans go gcuirfear isteacht orm. Baineann a cuid féin den rúndiamhracht leis an oíche féin, rud a chuidíonn liom mé féin a chur i dtiúin le rúndiamhracht Dé. Is gnás le manaigh guí istóiche ar feadh a saoil: nach dtig liomsa an rud céanna a dhéanamh ar feadh cúpla nóiméad ar a laghad sula dtéim a chodladh?

  • Nuair a ligim don Dea-Spiorad mé a threorú, cuirtear diminsean nua ingearach le mo bheatha. Níl mé sáinnithe in oabar feasta, ag maireachtáil ar phlána lom dhá thoise. Bíogtar mé. Airím Dia níos mó sa timpeall. Airím daoine freisin as an úire, mar íomhánna Dé, neacha iontacha nach bhfaighidh bás. Airím mé féin mar iompróir ghrá Dé, atá le roinnt agam ar dhaoine eile. Déantar spiorad le breis saoirse díom, agus breis sonais agam.

Comhrá

Cuirim i gcuimhne dom féin go bhfuilim i láthair Dé i gcónaí.
Ansin, samhlaím
Íosa féin ina sheasamh nó ina shuí os mo chomhair amach.
Nochtaim m'intinn
agus rún mo chroí dó.
Déanaim comhrá Leis díreach mar a dhéanfadh cáirde lena
chéile.

Críoch

Glóir don Athair agus don Mhac agus don Spiorad Naomh,
Mar a bhí ar dtús, mar atá anois agus mar a bheas go brách;
Trí shaol na saol.

Amen

Toggle Music