• Is amhlaidh a thugtar cuiradh duit le linn ghuí gach uile sheisiúin den chúrsa spioradálta seo éirí níos ciúine agus a bheith níos dírí agus níos réitithe i gcomhair éisteacht le briathar Dé. D’fhéadfá tosú inniu trí rud fisiciúil éigin a thógáil i do lámh, rud éigin ar féidir leat é a choinneáil go comporadach i do lámh. Dhéanfadh cupán cúis, nó píosa de thoradh, cleite, nó cloichín. Mura bhfuil aon cheo eile in aice láithreach, d’fhéadfá d’aird a dhíriú ar bhall éadaigh atá tú a chaitheamh. Roghnaigh rud éigin agus suigh go socair leis ar feadh nóiméid.
• Anois iompaigh an rud seo timpeall i do lámha. Breathnaigh go grinn air. Tabhair faoi deara an chaoi a n-airíonn sé, a throime atá sé, an bhfuil sé garbh nó mín, crua nó bog. Bíodh d’aird uile ar an rud seo atá tú a choinneáil i do lámha.
   

1 Croinicí 28: 2, 4-8
Ansin sheas Dáiví rí ar a chosa deiridh agus dúirt: “A ghaolta agus a mhuintir liom, tugaigí cluas dom: Thogh an Tiarna Dia Iosrael mise, thar theaghlach uile m’athar, le bheith i mo rí ar Iosrael go deo. Thogh sé Iúdá mar thaoiseach, agus mo fhine-se laistigh de theaghlach Iúdá; agus thar chlann mhac m’athar, thug sé mise mar rí d’Iosrael go léir le barr dea-mhéine. Agus thogh sé mo mhac Solamh thar mo chlann mhac go léir – mar bhronn an Tiarna a lán mac orm – le suí ar ríchathaoir an Tiarna i gceannas Iosrael. Dúirt sé liom: ‘Solamh do mhac a thógfaidh mo theach agus mo chúirteanna dom, óir thogh mé é le bheith mar mhac agam, agus beidh mise mar athair aigesean. Daingneoidh mé a fhlaitheas go brách, má choimeádann sé m’aitheanta agus m’orduithe mar atá siad inniu.’ I láthair Iosrael go léir anois, dá bhrí sin, agus i láthair chomhthionól an Tiarna, agus in éisteacht ár nDé, comhlíonaigí agus faighigí tuiscint ar aitheanta uile an Tiarna bhur nDia, i dtreo go mbeidh an tír bhreá thorthúil seo in bhur seilbh agus go bhfágfaidh sibh mar oidhreacht é ag bhur gclann in bhur ndiaidh go brách.”