Eoin 20:1-18

Agus an chéad lá den tseachtain tháinig Máire Mhaigdiléana go moch, agus an dorchadas fós ann, chun an tuama agus chonaic sí an líog aistrithe ón tuama. Rith sí ansin agus tháinig sí go dtí Síomón Peadar agus go dtí an deisceabal úd eile ab ionúin le Íosa. “Thóg siad an Tiarna as an tuama,” ar sí leo, “agus níl a fhios againn cár chuir siad é.” Amach le Peadar agus leis an deisceabal eile ansin agus chuaigh siad chun an tuama. Chrom siad a mbeirt ar rith in éineacht agus rith an deisceabal eile níos luaithe ná Peadar agus is é is túisce a tháinig go dtí an tuama. Nuair a chrom sé síos chonaic sé na línéadaí ina luí ansiúd, ach ní dheachaigh sé isteach. Ansin tháinig Síomón Peadar ina dhiaidh agus chuaigh sé isteach sa tuama, agus chonaic sé na línéadaí  agus an brat a bhí ar a cheann – ní i dteannta na línéadaí a bhí sé, ach fillte in aon áit amháin leis féin. Ansin an deisceabal eile, a tháinig ar dtús chun an tuama, chuaigh sé isteach agus chonaic agus chreid sé. Óir níor thuig siad go fóill an scrioptúr nárbh fholáir é a aiséirí ó mhairbh. Ansin d’imigh na deisceabail abhaile arís. Agus bhí Máire ina seasamh lasmuigh in aice an tuama agus í ag gol. Sa ghol di chrom sí síos agus d’fhéach isteach sa tuama, agus chonaic an dá aingeal in éidí geala ina suí mar ar luigh corp Íosa, aingeal acu ag an gceann agus an t-aingeal eile ag na cosa. “Cén fáth a bhfuil tú ag gol, a bhean,” ar siad léi. “Mar gur thóg siad mo Thiarna,” ar sí leo, “agus nach eol dom cár chuir siad é.” Arna rá sin di, d’iompaigh sí thart agus chonaic sí Íosa ina sheasamh ansiúd ach nár aithin sí gurbh é Íosa é. Dúirt Íosa léi: “A bhean, cén fáth a bhfuil tú ag gol? Cé atá uait?” Mheas sí gurbh é an garraíodóir é agus dúirt leis: “A dhuine uasail, más tusa a thóg é, inis dom cár chuir tú é agus tabharfaidh mé liom é.” “A Mháire,” arsa Íosa léi. D’iompaigh sise agus dúirt as Eabhrais: “Rabúnaí,” is é sin le rá: “A Mháistir!” “Scaoil liom!” arsa Íosa léi, “óir ní dheachaigh mé suas chun an Athar fós; ach imigh chun mo bhráithre agus abair leo: ‘Táim ag dul suas chun m’Atharsa agus chun bhur nAtharsa, chun mo Dhé-se agus chun bhur nDé-se.’” Tháinig Máire Mhaigdiléana leis an scéala do na deisceabail: “Chonaic mé an Tiarna,” agus go ndúirt sé na nithe sin léi.

• ‘Agus bhí Máire ina seasamh lasmuigh in aice an tuama agus í ag gol.’ Ní thaobhaíonn na deisceabail Máire agus í go cráite. Ní thuigeann siad fáth a caointe. Ní bhaineann siad meabhair ar bith as deora mná. Tá sé thar a n-acmhainn í a thuiscint agus dá réir sin bailíonn siad leo abhaile. Agus í ag caoineadh, cromann Máire agus breathnaíonn isteach sa tuama. Is léir di dhá aingeal ina suí san áit a raibh corp Íosa ina luí. ‘Cén fáth a bhfuil tú ag gol, a bhean’, ar siad. ‘Mar gur thóg siad mo Thiarna,’ ar sí leo,’“agus nach eol dom cár chuir siad é.’ Tá sí chomh cinnte sin de go bhfuil Íosa básaithe nach bhfuil ar a cumas meabhair a bhaint as an dá aingeal seo. Iompaíonn sí timpeall ansin agus feiceann sí Íosa ina sheasamh ann, ach ní thuigeann sí gurb é Íosa atá ann.
• Tá macalla chéad fhocail Íosa i Soiscéal Eoin sa méid a deir Íosa le Máire: ‘Cé atá uait?’ Céard é do fhreagra-sa?
• ‘A Mháire’, deir Íosa os íseal. Glaonn sé uirthi ina hainm, ise atá ar a mine géire ag cuartú a choirp mhairbh. Is é Íosa a aimsíos ise. Is caidreamh ar leith a caidreamh seisean léi-se agus is caidreamh ar leith a caidreamh sise leis-sean. Sin é an t-údar go n-aithníonn sí é nuair a ghlaos sé uirthi ina hainm. Cén t-ainm a bhaisteas an Tiarna ort-sa? Cén chaoi a n-aithníonn tú é a bheith i láthair i do shaol?

• Sul má chuirimid deireadh leis an gcúrsa spioradálta seo, is fiú breathnú siar agus gach a bhfanann leat a thabhairt faoi deara, agus gach ar mhaith leat a thabhairt leat i gcaitheamh na seachtainí agus na míonna seo chugat a mheabhrú duit féin. Tosaigh le roinnt focal is cuimhin leat ón gcúrsa spioradálta – focail a d’fhan leat go háirithe.
• Anois, agus tú ag iarraidh a bheith níos barainní, cé na focail áirithe ón Scrioptúr is mó a fhanas leat? Is fiú an ghuí sin a thabhairt chun cuimhne, a oiread agus is féidir leat, agus a dtarlaíonn i d’intinn agus i do chroí lena linn a thabhairt faoi deara agus tú ag tabhairt an chleachtaidh chun cuimhne. Cé acu de na mná seo is mó a thugas misneach duit? Cé na gnéithe dá scéal is mó a chuaigh i gcion ort?
• Seans go dtugann tú athrú éigin faoi deara ionat féin, nó i do ghuí, le seachtainí anuas ó thosaigh an cúrsa spioradálta seo. Má rinne tú iarratas ar Dhia ag an tús, an bhfuair tú é? Tharlódh gur thug Dia i bhfad níos mó duit ná ab fhéidir leat a iarraidh nó a shamhlú go fiú. Caith tamall ag gabháil buíochais le Dia as ucht gach a bhfuil déanta aige leat le linn an ama seo.